អៀង សារី កើតនៅថ្ងៃទី២៥ តុលា ១៩២៤ នៅស្រុកចូថាញ ខេត្តត្រាំងវិញ ពីដើមមានឈ្មោះខេត្តត្រាំង ជាដែនដីខ្មែរកម្ពុជាក្រោម។ ឪពុកជនជាតិខ្មែរ និងម្ដាយកាត់ចិន និងឈ្មោះដើម ជាភាសាវៀតណាម ហៅថាគិមត្រាំង។ នេះគឺជាលោក អៀង សារី។ គាត់បានក្លាយជាមនុស្សជាប់សាច់ឈាមជាមួយអ្នកស្រី ខៀវ ប៉ុនណារី ស្ត្រីទីមួយរបស់ ប៉ុល ពត តាមរយៈប្រពន្ធរបស់គាត់គឺលោកស្រី អៀង ធិរិទ្ធ។ ទាំង ប៉ុល ពត និងអៀង សារី គឺជាអតីតសិស្សសាលាវិទ្យាល័យព្រះស៊ីសុវតិ្ថជាមួយគ្នា ហើយរហូតបានជួបគ្នាដោយផ្ទាល់ និងជិតដិតជាងមុន គឺនៅពេលពួកគាត់ទាំងពីរជានិស្សិតអាហារូបកណ៍នៅប្រទេសបារាំង។ស្តាប់សម្លេង៖ បន្ទាប់ពីបានវិលត្រឡប់មកកម្ពុជាវិញ លោក អៀង សារី ត្រូវបានជ្រើសរើសជាគណកម្មាធិការកណ្ដាលនៃគណបក្សកម្ពុជាហើយក្រោយមក ប្រែក្លាយមកជាបក្សគុម្មុយនិស្តកម្ពុជា។ ក្នុងឋានៈជា អ្នកតស៊ូ របស់ចលនាខ្មែរក្រហម លោក អៀង សារី មានឈ្មោះមួយទៀត គឺសមមិត្ត វ៉ាន់។តំណែងនៅក្នុងរបបកម្ពុជាប្រជាធិបតេយ្យខ្មែរក្រហម។ លោក អៀង សារី មានតួនាទីជា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស។បន្ទាប់ពីការដួលរំលំរបបខ្មែរក្រហម លោក អៀង សារី នៅតែជាមេដឹកនាំម្នាក់មានឥទ្ធិពល របស់ចលនាទ័ពព្រៃ។ គាត់អាចទប់ទល់បាន សមរភូមិប៉ៃលិន ជាមួយនឹងការវាយលុករបស់កងទ័ពកម្ពុជាប្រជាមានិត ដែលមានកងទ័ពវៀតណាម គាំទ្រ គឺរហូតដល់ឆ្នាំ១៩៩៦។ ជំនួសការដែល លោក អៀង សារី បាននាំកំលាំងមួយភាគធំ ចូលខាងរដ្ឋាភិបាល អតីតមេដឹកនាំខ្មែរក្រហមរូបនេះ ក៏ទទួលបានការលើកលែងទោស ពីព្រះមហាក្សត្រកម្ពុជា ហើយធ្វើអោយទោស របស់លោកដែលតុលាការ ប្រជាមានិតកម្ពុជា កាត់ទោសប្រហារជីវិត ក៏ត្រូវទុកជាមោឃៈ។ប៉ុន្តែ ចូលដល់ដំណាក់កាលមួយទៀត លោក អៀង សារី ត្រូវបាននាំខ្លួនចេញពីភូមិគ្រឹះមួយនៅភ្នំពេញ ដោយទាំង លោកស្រី អៀង ធិរីទ្ធ ប្រពន្ធរបស់គាត់ គឺនៅថ្ងៃតែមួយ គឺនៅថ្ងៃទី១២ វិច្ឆិកា ២០០៧ នៅក្រោមដីការចាប់ខ្លួន គាត់ធ្វើឡើងដោយសាលាក្ដីខ្មែរក្រហម ពីបទឧក្រិដ្ឋកម្មសង្គ្រាម ប្រឆាំងមនុស្សជាតិនឹងឧក្រិដ្ឋកម្មសង្រ្គាម តាមច្បាប់អន្តរជាតិ។ ការកាត់មកលើរូបគាត់ រួមនឹងមេដឹកនាំ ៣រូបទៀត ក្នុងនោះមានទាំងលោកស្រី អៀង ធិរិទ្ធ ផងដែរ នឹងប្រព្រឹត្តទៅនៅថ្ងៃ២១ វិច្ឆិកា ខែក្រោយនេះ។ប៉ុន្តែអ្វីដែលធ្វើអោយមានការភ្ញាក់ផ្អើល គឺនៅថ្ងៃម្សិលមិញនេះ ក្រុមមេធាវីរបស់លោកអៀង សារី បានប្រកាសតាមសេចក្ដីថ្លែងការណ៍របស់ខ្លួនថា លោក អៀង សារី នឹងមិនឡើងធ្វើសាក្ខីកម្ម នៅក្នុងសវនការនោះទេ ដោយមានហេតុផលថា លោក អៀង សារី អាចភ្លេចស្មារតី ដោយសារតែសុខភាពទ្រុឌទ្រោមរបស់គាត់។លោកសហមេធាវី អាង ឧត្តម មានប្រសាសន៍បញ្ជាក់ថា តាមផ្លូវច្បាប់ កូនក្ដីរបស់លោកអាចបដិសេធគ្រប់ដំណាក់កាល នៃការចោទសួរមកលើខ្លួន ៖ “បើចងបន្ទោស គួរតែបន្ទោសច្បាប់វិញ ច្បាប់បានអនុញ្ញាត្តឲ្យជនរាល់រូប រកសិទ្ធិមិនបាន ហើយតំណាក់កាល់នេះ អ្នកណានិយាយអីកើត ព្រោះមិនមែននិយាយ ១ថ្ងៃ ២ថ្ងៃឯណា មិនដឹងនិយាយប៉ុន្មានឆ្នាំ ហើយនិយាយអីកើត សំរាប់សុខភាពផ្លួវការ ផ្លួវស្មារតីវាអត់ទទួលកើត ទើបសំរេចទទួលសិទ្ធិនឹងទៅ។”នៅក្នុងជួរមេដឹកនាំខ្មែរក្រហម លោក អៀង សារី ជាមនុស្សទី៦ នៃជួរគណកម្មាធិការកណ្ដាលមជ្ឈឹមបក្សនៃរបបកម្ពុជាប្រជាធិបតេយ្យខ្មែរក្រហម។ សំរាប់មេដឹកនាំខ្មែរក្រហមរូបនេះ ក៏មានឈ្មោះជាអ្នកបានគៀងគរនិស្សិត និងបញ្ញវ័ន្ដរៀននៅបរទេស អោយមកកាន់ប្រទេសកម្ពុជាវិញ ហើយក្រោយមកត្រូវបានយកទៅធ្វើពលកម្មធ្ងន់ធ្ងរនឹង ចាប់ខ្លួន យកទៅដាក់គុកនៅគុកបឹងត្របែក និងក្រោយមកគុកទួលស្លែង។ ការដែលលោក អៀង សារី បដិសេធការបងា្ហញសាក្ខីកម្មនៅក្នុងសវនការ គឺជាការគេចវេះ ក៏ថាបាន។បុរសម្នាក់ ដែលបានសុំមិនបញ្ចេញឈ្មោះ ប៉ុន្តែបានអះអាងថា គាត់ជាដើមបណ្ដឹងរដ្ឋប្បវេណី ក្នុងសំនុំរឿង០០២ បាននិយាយថា នេះជាការមិនព្រមទទួលស្គាល់ នូវកំហុសរបស់ខ្លួន ដែលដឹកនាំប្រទេសហើយបង្ករអោយមានវិនាសកម្មយ៉ាងឈឺចាប់ ៖ “ខ្ញុំមានអារម្មណ៍ថា អ្វីដែលគាត់មិន ឆ្លើយនៅក្នុងតុលាការ ឬក៏សក្ខីកម្មផ្សេងៗ ជួនតុលាការជាការមួយដែលគាត់ចង់គេចពីការពិតប៉ុណ្ណោះ។ មានការបារម្មណ៍ខ្លះដែរ ក៏ប៉ុន្តែរខ្ញុំសង្ឃឹមថា មានឯកសារគ្រប់គ្រាន់សំរាប់ ធ្វើឲ្យតុលាការគេសំរេចសេចក្តីឲ្យ។”កាលពីក្នុងរបបកម្ពុជាប្រជាធិបតេយ្យ លោក អៀង សារី គឺជាប្រមុខកាទូតខ្មែរ ហើយគាត់បានដើរច្រើន នៅបណ្ដាប្រទេសសង្គមនិយម ដោយរួមមានប្រទេសចិន និងប្រទេសវៀតណាម។ទាំងលោក អៀង សារី និងប្រពន្ធរបស់គាត់ លោកស្រី អៀង ធិរិទ្ធ សុទ្ធតែបានស្នើសុំនៅក្រៅឃុំ ប្រយោជន៍ ដើម្បីអោយគាត់បានចេញទៅព្យាបាល នៅប្រទេសថៃ ប៉ុន្តែត្រូវបានសាលាក្ដីបដិសេធន៍ ហើយនៅមុនចាប់ខ្លួន គាត់ត្រូវបានកាសែតជាច្រើន ចុះផ្សាយថា លោក អៀង សារី ស្វែងរកការជ្រកកោននៅប្រទេសគុបា ប៉ុន្តែត្រូវបានគ្រួសាររបស់គាត់បដិសេធន៍។ ករណីនេះ ធ្វើអោយមានការសង្ស័យពីភាពស្មោះត្រង់របស់គាត់ ចំពោះសវនការ និងប្រទេសជាតិ។ សំរាប់លោកមេធាវីដើមបណ្ដឹងរដ្ឋប្បវេណី លោក ហុង គឹមសួន សង្ឃឹមថា លោក អៀង សារី អាចធ្វើបែបនេះបាន ពីព្រោះច្បាប់របស់សាលាក្ដីមិនមានកំនត់នោះទេ តែគាត់ថា លោក អៀង សារី គួរមានឆន្ទៈក្នុងនាម ជាមេដឹកនាំខ្មែរក្រហម ៖ “ជនរងគ្រោះនៅតែមានជំនឿថា បើលោក អៀង សារី គាត់ភ័យខ្លួនគាត់ ខ្លាចការនិយាយទៅនឹងកែមិនរួច មានន័យថាគាត់បានប្រព្រឹត្តទោសឧក្រឹដ្ឋទៅហើយ នេះជាអ្វីដែលជនរងគ្រោះតែងតែលើកឡើងតែងតែនិយាយ។”
សំរាប់លោក អ៊ូ វីរៈ ប្រធានមជ្ឈមណ្ឌលសិទិ្ធមនុស្សកម្ពុជា សង្ឃឹមថា សហព្រះរាជអាជ្ញារបស់សាលាក្ដីនឹងមានទេពកុសល្យចោទសួរ ដើម្បីបានចំលើយពី លោក អៀង សារី ៖ “ជាទទូចទៅគឺក្រុមការពារ គេខំរកភស្តុតាង ដើម្បីការពារ ហើយក្រុមព្រះរាជាអាជ្ញារគេខំរកភស្តុតាង ដើម្បីដាក់បន្ទុកក្នុងនេះ ដូច្នេះអត់មានអីប្លែកទេក្នុងករណីដែលកូនក្តី ជាជនជាប់ចោទមិននិយាយ។”សំរាប់ជនត្រូវចោទរូបនេះ ហាក់ពុំដែលមានសេចក្ដីការណ៍ផ្ទាល់ខ្លួន ដូចលោក នួន ជា នឹង លោក ខៀវ សំផន នោះទេ ប៉ុន្តែសំរាប់លោកស្រី អៀង ធិរិទ្ធ ប្រពន្ធរបស់គាត់ ពេលខ្លះនិយាយដាក់កំហុសមកលើលោក នួន ជា ថាជាអ្នកនាំអោយមានការយកមនុស្ស មកដាក់គុកនៅគុកទួលស្លែង។សំរាប់លោក ឆាំង យុ ប្រធានមជ្ឈមណ្ឌលឯកសារកម្ពុជា បានប្រាប់សំលេងប្រជាធិបតេយ្យកាលពីប៉ុន្មានសប្ដាហ៍មុននេះថា បើទោះជាមានឧបសគ្គខ្លះៗ ក៏ការបើកសវនការលើសំនុំរឿង ០០២ ប្រឆាំងនឹងអតីតមេដឹកនាំខ្មែរក្រហម ៤រូប ដោយរួមទាំង លោក អៀង សារី ផងដែរ គឺជាការបើកទំព័រប្រវត្តិសាស្ត្រ យ៉ាងពិតប្រាកដ ចំពោះវាលពិឃាត នៃរបបខ្មែរក្រហម ៖ “ការកាត់ទោសវាហាក់ដូចជាឲ្យយើងចាកផុតពីភាពងងឹង អន្ធកាល ហើយឈានទៅមុខ ហើយវាធ្វើឲ្យយើងមានអារម្មណ៍ថា ទីបំផុតទៅ យើងក៏ទទួលបាននៅ អារម្មណ៍ថាយុត្តិធម៌ក៏ជិតមកដល់ដែរ។”បើទោះជាយ៉ាងណា លោកមេធាវីការពារក្ដី អោយលោក អៀង សារី លោកមេធាវី អាង ឧត្តម មានប្រសាសន៍ថា ការកាត់ក្ដីចំពោះមេដឹកនាំខ្មែរក្រហមនៅពេលនេះ គឺគ្រាន់តែស្វែងរកយុត្តិធម៌ ដែលបានកើតឡើង ក្នុងរបបកម្ពុជាប្រជាធិបតេយ្យខ្មែរក្រហម តែប៉ុណ្ណោះគឺមិនមានជាការស្វែងរកការពិតនោះទេ។យោងតាមសេចក្ដីប្រកាសព័ត៌មានរបស់សាលាក្ដីខ្មែរក្រហម ទាំងលោក អៀង សារី លោកស្រី អៀង ធិរិទ្ធ លោក នួន ជា និងលោក ខៀវ សំផន ពួកគាត់គឺជាអតីតមេដឹកនាំខ្មែរក្រហម នឹងត្រូវនាំខ្លួនមកជំនុំជំរះក្ដី លើបទឧក្រិដ្ឋនៅកម្ពុជាកាលពីរវាងឆ្នាំ ១៩៧៥ និង ១៩៧៩ នៅថ្ងៃទី២១ ខែវិច្ឆិកា ខែក្រោយនេះ ហើយពេលនោះការលាតត្រដាងរបស់សាក្សីប្រវត្តិសាស្ត្រ នឹងបានបញ្ជាក់ថា តើលោក អៀង សារី ជាអ្នកណា?
ប្រភព vodhotnews.com
0 comments:
Post a Comment